โอน้อ สุขอยู่ไส ไผเห็นบ้าง คือบ่ย่าง มาจั๊งงัว สิดักรับ จับไปครัว ลาบขมนัว คั่วใส่เพี้ย ตักมาเปิบ เสิร์ฟให้เสี่ย เถ้าแก่เนี้ย แก้เพลียใจ ทั้งรวยจน คนเดนตาย ได้รับรส สุขสดๆร้อนๆ เหอๆ หล่านางเอ้ย ใกล้สิได้ อ้ายแล้ว สังสิแส่ว แจวหนี ยังบ่ลอง ของดี หรือผีนา บังตาไว้ บ่ทันส่วง หายป่วงไข้ หมอใหญ่ ยังบ่ได้ฉีดยา ซ่างหันหลัง สั่งลา บ่ย่านห่า กินคนตี้ อิอิ หล่านางเอ้ย คันแม่นน้องฮักอ้าย ฟ้าวขายนา แม่มาแต่ง หรือเอาที่เข้าแบงก์ แปลงสินทรัพย์ รับเป็นหนี้ อิอิ พี่น้องเอ้ย คนคือกัน ส่างหยันเย้ย เพิ่งเคยเห็น เป็นของแปลก พะนะ เว้าจอกหลอก ออกแจกแหลก แดกดันเขา สาวขี้ล้าย สัตว์หายาก ปากดีฮ้าย ทิ้งท้ายว่า ส่างกล้าเกิด พี่น้องเอ้ย เป็นเรื่องใหญ่ ในโซเชียล เมื่อผมเขียน เรียนเจ้านาย คราวพบพ้อ บ่ทักทาย คำนับนาย ในวันนั้น มื้อหลอยเมีย กินเบียร์ปั่น นัดสังสรรค์ วันเมียเผลอ พี่น้องเอ้ย ข่าวคึกโครม สาวนมน้อย ให้หมอซ่อย พลอยขื่นขม พึ่งมีดหมอ เจาะราวนม เต้ากลึงกลม สมใจเจ้า ความมั่นใจ หลั่งไหลเข้า เป็นสาวมั่น ทันสมัย โพสรูปทรง ลงออนไลน์ สู่เป้าหมาย เน็ทไอดอล พี่น้องเอ้ย อุกอั๊งเหลือ เบื่อชาวบ้าน ซุบซิบกัน ย่านเฮาฟัง เห็นหน้าเว้า ปานเล่าหนัง ละครดัง ทางช่องแปด เม้าท์สนั่น วิจารณ์แซด แชร์คลิปแมส เม้นท์แรดเหลือ ว่าสงเคราะห์ กะบ่เชื่อ ช่างน่าเบื่อ เอาเหลือใจ ซ่างขุดคุ้ย คุยขยาย เมียเอาตาย ไผรับผิดชอบ อิอิ